Gebyr for sakshandsaming og kontroll av avløpsanlegg - høyring av lokal forskrift

I sitt møte 1.2.23 gjorde Luster formannskap følgjande vedtak i sak 10/23:

1. Utkast til Forskrift om gebyr for sakshandsaming og kontroll av avløpsanlegg i Luster kommune vert lagt ut på høyring
2. Høyringsfrist er 6 veker frå utlegging

Bakgrunn 

Kommunen er forureiningsstyresmakt for kapittel 12, 13, 15 og 15A i forureiningsforskrifta. Det er ingen heimel for å fastsetje gebyr for sakshandsaming og kontroll etter forureiningsforskrifta i enkeltvedtak. Alternativet til ein gebyrforskrift er derfor at kommunen finansierer dette arbeidet over det ordinære kommunebudsjettet. Det er knytt store forventningar til kommunen sitt ansvar med å følgje opp som forureiningsstyresmakt på avløp, og lokal forskrift om Gebyr for sakshandsaming og kontroll blir sett på som naudsynt for å kunne gjere denne jobben på ein ansvarleg måte.  

Høyringsframlegget til lokal forskrift, tek utgangspunkt i Norsk Vann sin rapport 267/2022. I rapporten frå Norsk Vann er det rådd til å unngå å ta gebyrsatsane inn i forskrifta, og i staden fastsetje satsane årleg slik som kommunen gjer for andre typar gebyr. Gebyra skal ikkje overstige kommunen sine kostnader ved sakshandsaminga eller kontrollen. Gebyr for kontroll/tilsyn vert fastsett som årsgebyr, sjølv om kontrolltiltak på det einskilde anlegg vert gjennomført sjeldnare enn kvart år.  

Ved å fastsetje ein lokal forskrift om gebyr for sakshandsaming og kontroll, vil kommunen få høve til å få finansiert sitt arbeid som forureiningsstyresmakt på avløpsområdet. Gebyra skal ikkje overstige kommunen sine kostnader ved sakshandsaminga eller kontrollen. Formannskapet har lagt utkastet til forskrift ut på høyring, i tråd med forvaltningslova §37. 

Mange av avløpsanlegga i Luster kommune er frå ei tid då det vart sett mindre krav til reinsing enn i dagens forureiningsforskrift. I tillegg vil også funksjonen til anlegga svekkast over tid. Eldre anlegg kan dermed ureine vassdrag og sjø, og dette er spesielt alvorleg dersom sårbare økosystem, badeplassar og drikkevasskjelder blir påverka.  

Dette gjeld særleg spreidde private avløpsanlegg, der kommunen vil styrke arbeidet med tilsyn. Regional plan for vassforvaltning for Vestland vassregion 2022-2027 fastset miljømål og viser korleis vi ynskjer å forvalte vassmiljøet og vassressursane i eit langsiktig perspektiv, og vart godkjend av Klima- og miljødepartementet 31.10.22. Godkjent regional plan for vassforvaltning skal leggjast til grunn for regionale organ si verksemd, og for kommunal og statleg planlegging og verksemd i regionen, jf. vassforskrifta § 29 og plan- og bygningslova § 8-2.