Laurdag 30.nov er siste dag for innbetaling til Spring for Syria-aksjonen vår, og me kom langt over målsettinga vår med innsamling på 7220 kroner til Redd Barna sitt arbeid for krigsramma barn i Syria - flott innsats!

Så er det klart for "Omvendt julekalender" (i regi av SOS Barnebyer) der me kvar dag ser ein liten filmsnutt frå korleis barn har det ulike plassar i verda, og skuleungane kan samle inn pengar ved å gjere arbeidsoppgåver i heimen og ta med betalinga til skulen i ein eigen konvolutt (me samlar inn kvar fredag fram til jul).

Elevane stilte opp med lyktene sine (alle lagar si eiga lykt i 1.klasse) og song lyssongar. Turen gjekk bort til barnehagen, der ungane hadde flokka seg i glaset for å sjå og høyre. Tilbake på skulen var det peparkaker og klementiner, og me song resten av songane me øver på til juletrefesten. Det har vorte tradisjon at når soli forsvinn (rundt 1.12), så markerer me dagen med lys og songar, og oppfordrar alle til å "lyse for kvarandre" i mørketida.

Rim og regler, songar, skrivedans og leik stod på programmet. Vi var ute i friminuttet i lag og kosa oss med niste.

Den tradisjonelle juletrefesten vert i år søndag 15.desember kl 14. Julespel er valt ut, og alle elevane har fått ynskje seg roller ved hemmeleg val. Der fleire har ynskt same rolle, har me trekt. Me trur alle no er nøgde og spente på øving - det vert teater med ei rekkje musikalske innslag. Instrument har elevane òg valt sjølve.

Elevane i 1.-4.trinn sprang og sprang med godt humør rundt idrettsbana, mange i ganske tunge dressar i det blaute vêret. Elevane i 5.-7.trinn sprang innover mot Espe, opp til 5,2 km totalt. Alle vart gode og slitne etter springinga, men det var god stemning, og etterpå fekk alle saft og frukt i lag. Etter den innsatsen er alle spente på innbetalinga til aksjonen! PS. Det er lov å støtte aksjonen utan å ha laga sponsoravtale med elev òg.