Prosjekt - Folk i fleire hus "Det gode liv på landet" er motivasjon for stadig fleire som ynskjer å flytta motstraums,- bort frå trøyngsle og trafikk i tettbygde strok og til eit reinare og tryggare oppvekstmiljø for borna i bygde-Noreg. I Luster har me kvalitetane som mange drøymer om, flott natur, trivelege lokalmiljø og rikeleg med boltreplass for vaksne og born.

Det viktigaste hinderet for å realisera draumen om det gode liv i Luster, er for mange at dei ikkje klarer å få seg ein stad å bu, trass i at fråflytta hus mange stader ligg som perler på ei snor. Det er nemleg svært få eigarar som ynskjer å selja eller leiga ut perlene sine, jamvel om dei ikkje har høve til å bruka dei noko særleg sjølve.